Denbora-bitarte batean ur-masa batetik atmosferara lurrundutako ur-kopurua neurtzeko tresna; lurrundutako ur-kopuruaz gain, aireak lurruntzeko duen gaitasuna ere neurtzen du.

Lurrunketa balioesteko hainbat sistema erabili ohi da. Horrela, bada, Wild-en ebaporimetroak erresorteko balantza batetik zintzilikaturik dagoen urez betetako ontzi bat erabiltzen du; balantzak zuzenean adierazten du zenbat ur lurrundu den. Piché-ren ebaporimetroan, lurrunketa likidoa daraman tutu batean ipinitako eskala graduatu batean neurtzen da.